Bli med på sommarens sprekaste eventyr

Med Stikk UT! er det enkelt å kome seg ut på tur og få mange fine naturopplevingar.

Om lag 20 prosent av turmåla denne sesongen er nye, noko som gir gode moglegheiter til å utforske nye stiar og område. 

Stikk UT! er kjent for gode turskildringar og god merking av turruter. Dette gjer det enkelt å finne fram til nye turmål, sjølv utan lokalkunnskap. Å lese turskildringa før turstart er ein viktig del av planlegginga, og gir et mykje betre utgangspunkt for ei god turoppleving.

Turmåla denne sommaren finn ein i Stikk UT!-kartet, på stikkut.no og i Stikk UT!-appen. 
Kartet er sendt ut til alle husstandar i fylket. I tillegg får ein kart på servicekontora i kommunane, slik at den som eventuelt ikkje har fått det i postkassa kan hente det der.

Kartet er friluftsråda sin invitasjon til alle om å delta på Stikk UT!. Vi har erfart at det er ei viktig inspirasjonskjelde til både nærturar og til å oppleve nye turmål.

Kartet for Sunnmøre kan du laste ned her, og her finn du årets turmål.

Alle som skal på tur må ta omsyn til natur, grunneigarar, dyr, fuglar og alle ein møter.

Til alle hundeeigarar, hald hunden i band så den ikkje skremmer fuglar eller gjer skade på beitedyr. Og hugs å ta med hundebæsjeposen heim.

Her finn du ein video om turvett.

I desse dagar er fleire hundre frivillege ute med kodelappar og merkar turmåla som er med i sommarsesongen.
Dei frivillege er heilt avgjerande for at vi skal klare å gjennomføre Stikk UT! i den skala vi gjer, så ei stor takk til dei. Friluftsrådet rettar også ei takk til kommunane, som saman med dei frivillege vel ut turmål og ordnar det praktiske kring turmålet, og til alle velvillege grunneigarar.

2026 er Totalforsvarsåret, med auka merksemd på beredskap og eigenberedskap i samfunnet. Erfaring viser at friske og aktive innbyggjarar er betre rusta til å møte kriser. Eigenberedskap handlar om å kunne klare seg sjølv i ein periode, ta vare på kvarandre og kjenne nærmiljøet sitt. 

Gjennom Stikk UT! blir dette styrkt kvar dag. Turane bidreg til å gjere folk friskare og meir robuste, det gir overskot og meistring, og styrkar den mentale helsa. Stikk UT! er difor ei form for enkel beredskap.