Prøvekaninane - om kva leik og rørsle ute gjer med oss

Fagfornyinga i skulen har folkehelse, livsmeistring og berekraft som overordna målsetningar og stiller store krav til dei tilsette i skulen om å omsette desse omgrepa til praksis. Rørsle og leik er blitt løfta fram som sentrale metodar, men forsking viser at mange tilsette i skulen treng fagleg og praktisk påfyll for å gjere denne jobben enda betre. Vi har derfor utvikla ein praktisk verkstad der temaet er: rørsle og leik ute sett i eit fysisk, sosialt og kreativt perspektiv.

Verkstaden inspirerer oss alle til å kjenne på gleda i rørsle og uteleik, og til å sjå på nye moglegheiter for å bruke det i kvardagen. Det vil gje skulane gode, praktiske verktøy som kan brukast rett inn i undervisninga og skape større medvit om samanhengen mellom kropp, kjensler og tankar. Her legg vi vekt på at praksis og refleksjon går hand i hand. 

Leiken sin eigenverdi er sentral, meir allsidig rørsle gir meir glede for alle og ikkje minst: Korleis bygge opp eit stort leikerepertoar som kan brukast til ulike behov? Kurset varer i 2,5 timar og kan gjennomførast i utviklingstida til skulen.  Verkstaden er gratis og er gjort mogleg av Sparebanken Møre. 

Praktisk
Vi vil nytte fleire av leikane frå kursa med Leikepatruljen og i tillegg  bruke tid på å knytte det opp mot faglege refleksjonar. Verkstaden kan tilpassast i lengde, men skal minimum vare i 2,5 timar. Døme på timeplan: 

14.00 - 14.45: Leik og rørsle før og no- kvifor leikar vi og kva gjer leiken med oss?    

14.45- 15.30 : Inndeling i grupper, demonstrasjonar og leikar

15.30 - 16.30: Fellesøvingar, refleksjonar.  

Vi held dette kurset for ein og ein skule og det er avgjerande at alle tilsette på kvar skule deltek. Om dykkar skule er med i Leikepatruljen har de automatisk høve til å be om verkstad. Vi strekk oss langt i å tilpasse verkstaden til skulen sin timeplan. Tilbodet er gratis. Ta kontakt her: inger@friluftsraadet.no

For nye skular er det eit tilbod til skular som vil bli med i Leikepatruljen. Da må alle tilsette på skulen først gjennomføre verkstaden i uteleik og rørsle før elevane får kurs med Leikepatruljen. Dette er for å skape større forståing og god implementering i heile organisasjonen om uteleik og rørsle. 

Inger Bakke. Bakke er utdanna skodespelar og har turnert for Den kulturelle skulesekken i 15 år. Ho er no tilsett i Sunnmøre friluftsråd som prosjektleiar for «Slå på ringen» der ho har leia Leikepatruljen sidan 2019. Ho har lang erfaring som kurshaldar og er særleg engasjert i barn og vaksne sitt forhold til leik, natur og kreativitet.  Ho brenn for kvar og ein sitt eige initiativ, utfordre og å legge til rette for enda meir rørsle og kreativitet. God vegleiing av den vaksne er avgjerande for å vekke den gløymte leiken til liv igjen.  

Viggo Solum. Solum er utdanna skodespelar og har vore aktiv utøvar og kurshaldar i 30 år. Han har særleg erfaring med fysiske uttrykk og har undervist ved dramalinja ved Fagerlia vidaregåande skule i 10 år.  Solum brenn for leik, kreative løysningar og utforsking. Bakke og Solum har samarbeida i kunst- og kulturprosjekt i 20 år.